TÀRDE NUÈSTRE – GELBISON = 1 A 0…GIMME SOME, MEL GIBSON O JAMES BROWN?

La splendida cronaca in vernacolo del polivalente artista Aldo Salamino, assolutamente da non perdere!

Cu cci ‘è c’áme sciuca’ òsce m’ha dumannáte attàneme? No’nge tenéve ‘u curàgge de respònnere!...Hàgghie dìtte cìtte cìtte: Gee…bb…so!... Me díce: Ce jèèèèè?...Papà…c’u Gelbison! Me uàrde e ddice: Quìdde ca fànne le dendiére?...Le dendiéreeee? Ma ce ste’ ddíce? Se chiáme accussì ‘na squàdre d’a Cambanije! Me fàsce: Ah si’! Hàgghie capíte! Mel Gibson!...Mel Gibson? Papà! Me ne stòche a vvòche ije! Aspeeeee’! No’nge ha spicciáte ‘u fàtte! Ste’ scéve ô càmbe e fìgghieme me fàsce ‘a stèssa domànde: Cu’ cci sciòche ‘u Tàrde òsce?...Hàgghie ditte: Cu’ ‘na squàdre napuletáne! E m’hàgghie allestáte! Ehehehe!

Òsce ô càmbe stàvene pìcche cristiáne! Mah! Nemmànghe quànne vengíme s’ènghie ‘u càmbe? ‘U Tàrde Nuèstre ha sciucáte finalmènde cu ‘a màglie rossoblù! E tànde ‘nge vuléveeeee! E avàste cu ‘ste màglie doráte, bbiànghe, a ppuà…’nu síme ròsse e bblù! E nniènde cchiù! ‘U Tàrde Nuèstre ha ffàtte ‘na bèlla partíte c’u jam Session…cioè…c’u Gipsy King…Ste’ facèmme ‘u gol ggià cu CIARCIA’ ca ha menáte ‘na punizzióne sús’a travèrse! Ma  mèndre ste’ spicciáve ‘u príme tíembe MOLINARI ha fàtte ‘na sgroppáte e ha sbunnáte ‘na cannunáte ca ha scheggiáte ‘u pále! Paréve gol!...Mbece nóne! Ha pigghiáte ‘a pàlle ANCORA, ha fàtte ‘na piroètte e ha státe scettáte ‘ndèrre! RIGORE! RIGORE!RIGORE! Uèèèèè! Ce s’ha ‘ngandáte ‘u dische? ‘A propòsete de dìsche…sús’ô dischètte ve’ il bomber HERNAN ca fasce ‘nu còlpe e ‘na líre. GOL!GOL!GOL! Beh! Uagnù! Ne sendíme e ne vedíme! Fòrza Tàrde Nuèstre e ‘nu penziére pe’ Mamma méje ca no’ ss’ha sendúte bbóne! Mannàgghie a’ vecchiáje! Fòrza Ma’!